ചങ്ങനാശ്ശേരി: നൂറ്റാണ്ടുകളുടെ വിശ്വാസപാരമ്പര്യമുള്ള ചങ്ങനാശ്ശേരി പാറേല്‍ മരിയന്‍ തീര്‍ത്ഥാടനകേന്ദ്രത്തിലെ പുതുതായി നിര്‍മ്മിച്ച ദൈവാലയത്തിന് പരിശുദ്ധ പിതാവ് ലെയോ പതിനാലാമന്‍ പാപ്പാ 'ബസിലിക്ക' (മൈനര്‍ ബസിലിക്ക) പദവി നല്‍കി ഉയര്‍ത്തി. കത്തോലിക്കാസഭയില്‍ മേജര്‍ ബസിലിക്കകളും മൈനര്‍ ബസിലിക്കകളുമുണ്ട്. റോമിലെ നാലു പ്രധാന ദൈവാലയങ്ങളായ സെന്റ് പീറ്റേഴ്‌സ്, സെന്റ് ജോണ്‍ ലാറ്ററന്‍, സെന്റ് പോള്‍സ്, സെന്റ് മേരി മേജര്‍ എന്നിവയാണു നാല് മേജര്‍ ബസിലിക്കകള്‍. അവ കൂടാതെ ലോകമെമ്പാടും അനേകം മൈനര്‍ ബസിലിക്കകളുമുണ്ട്. ദൈവാലയത്തിന്റെ കൂദാശാകര്‍മ്മങ്ങള്‍ക്കൊരുങ്ങുന്ന ഈ വേളയിലാണ് ചങ്ങനാശ്ശേരി അതിരൂപതയ്ക്കും സീറോ മലബാര്‍ സഭയ്ക്കും ഏറെ അഭിമാനകരമായ ഈ പ്രഖ്യാപനമുണ്ടായിരിക്കുന്നത്. ചങ്ങനാശ്ശേരി അതിരൂപതാ മെത്രാപ്പോലീത്താ മാര്‍ തോമസ് തറയില്‍ ഔദ്യോഗിക സര്‍ക്കുലറിലൂടെയാണ് വിശ്വാസികളെ ഈ സന്തോഷവാര്‍ത്ത അറിയിച്ചത്.
പ്രധാന സവിശേഷതകള്‍:
* പുതിയ നാമധേയം: ദൈവാലയം ഇനി മുതല്‍ 'പാറേല്‍ മര്‍ത്ത് മറിയം അമലോത്ഭവ ബസിലിക്ക' എന്ന പേരിലായിരിക്കും അറിയപ്പെടുന്നത്.
* അതിരൂപതയിലെ രണ്ടാമത്തെ ബസിലിക്ക: 16 നൂറ്റാണ്ടുകളുടെ ചരിത്രമുള്ള ചമ്പക്കുളം സെന്റ് മേരീസ് ബസിലിക്കയ്ക്ക് ശേഷം ചങ്ങനാശ്ശേരി അതിരൂപതയില്‍ ബസിലിക്ക പദവി ലഭിക്കുന്ന രണ്ടാമത്തെ ദൈവാലയമാണിത്.
* പദവിയുടെ പ്രാധാന്യം: 120 വര്‍ഷത്തെ മഹിതമായ ചരിത്രമുള്ള പാറേല്‍ തീര്‍ത്ഥാടനകേന്ദ്രത്തിന്റെ പൗരാണികത്വം, ചരിത്രപരമായ മൂല്യം, ശില്പകല, ആരാധനക്രമപരമായ സജീവത്വം എന്നിവ പരിഗണിച്ചാണ് മാര്‍പാപ്പ ഈ ഉന്നത പദവി നല്‍കി അനുഗ്രഹിച്ചത്.
* ആത്മീയ നേട്ടങ്ങള്‍: ബസിലിക്ക പദവി ലഭിച്ചതോടെ പ്രധാന തിരുനാളുകളിലും നിശ്ചിത കാലയളവുകളിലും ഇവിടെ എത്തുന്ന വിശ്വാസികള്‍ക്ക് പൂര്‍ണ്ണ ദണ്ഡവിമോചനം പ്രാപിക്കാനുള്ള പ്രത്യേക അവസരമുണ്ടായിരിക്കും.
പൗരസ്ത്യസഭയോടും അതിരൂപതയോടുമുള്ള പരിശുദ്ധ പിതാവിന്റെ പ്രത്യേക വാത്സല്യത്തിന്റെയും, ആഗോള കത്തോലിക്കാസഭയുമായുള്ള അഭേദ്യമായ ബന്ധത്തിന്റെയും അടയാളമാണ് ഈ പ്രഖ്യാപനമെന്ന് മാര്‍ തോമസ് തറയില്‍ സര്‍ക്കുലറില്‍ വ്യക്തമാക്കി. നവംബര്‍ 21, 23 തീയതികളില്‍ നടക്കുന്ന ദൈവാലയ കൂദാശയുടെയും ബസിലിക്ക പ്രഖ്യാപനത്തിന്റെയും തിരുക്കര്‍മ്മങ്ങളിലേക്ക് എല്ലാ വിശ്വാസികളെയും അതിരൂപതാ നേതൃത്വം സ്നേഹപൂര്‍വ്വം ക്ഷണിച്ചു.
